LSDM: Nuk marrim pjesë në zgjedhje

Në qoftë se pushteti do të kërkonte zgjedhje të parakohshme parlamentare, qofshin ato të pjesshme apo të përgjithshme, LSDM-ja nuk do të merrte pjesë në ato, për shkak se kriza politike në vend nuk do të zgjidhej, por do të thellohej më shumë.

 

Kështu ka deklaruar Petre Shilegov, zëdhënës i LSDM-së, pas deklaratës së publikuar në disa media të kryetarit të grupit parlamentar të VMRO-DPMNE-së, Ilija Dimovski, se në nëntor mund të ketë zgjedhje të pjesshme parlamentare.

 

Madje, Shilegov ka deklaruar që LSDM-ja qartë dhe publikisht ka parashtruar 5 kërkesat e saj, ndërsa nuk do të marrë pjesë në zgjedhje të cilat nuk do të jenë të organizuara nga një qeveri teknike.                

“Katër nga ata korrespondojnë në tërësi me raportin e OSBE/ODIHR-it pas zgjedhjeve parlamentare në prill të këtij viti, kushti i pestë, qeveria teknike është kusht që ne e vendosim, duke pasur parasysh që VMRO-DPMNE dhe Nikoilla Gruevski e ka humbur tërësisht besimin te LSDM për mundësinë dhe vullnetin e tyre, që të organizojnë zgjedhje normale, korrekte dhe demokratike. Për këto arsye, LSDM-ja tërësisht do të mbetet në qëndrimet e thëna deri më tani”- deklaroi zëdhënësi i LSDM-së, Petre Shilegov.        

                               

Nga BDI, deputeti, Rafiz Haliti, deklaron se BDI çdo herë i ka bërë thirrje opozitës që të kthehet në kuvend, për shkak se zëri i opozitës duhet të dëgjohet prej ulëseve të kuvendit, pasi ajo është edhe në interes të qytetarëve.

 

Haliti shprehet se pavarësisht raportit që vendi do të marrë nga KE, kuvendit i takon të vendosë se kur duhet të mbahen zgjedhje parlamentare.    

                                                        

“Sa i përket raportit që RM do të merr, pavarësisht se çfarë raporti do të merr, mendoj se kryetari i kuvendit dhe deputetët e kuvendit gjithsesi duhet të respektojnë rregulloren e kuvendit dhe në bazë të rregullores duhet të bihen vendimet se a do të ketë zgjedhje parciale të parakohshme, ato gjëra i rregullon rregullorja dhe ne jemi të detyruar që në bazë të rregullores t’i sjellim vendimet tona”- tha deputeti i BDI-së, Rafiz Haliti.                                                 

 

Dje, kreu i grupit parlamentar të VMRO-DPMNE-së, Ilija Dimovski, në deklaratën e transmetuar nga Televizioni “Telma”, ka deklaruar se nëse deputetët e opozitës, të kryesuar nga LSDM-ja, nuk kthehen në kuvend, në nëntor nuk përjashtohet mundësia e shpalljes së zgjedhjeve të parakohshme parlamentare.

 

Por, sot, vetë Dimovski ka dalë me deklaratë tjetër për disa portale informatike, ku ka deklaruar se deklarata e një dite më parë i është nxjerrë nga kontesti.

 

Madje, Dimovski ka thënë se shpreson që nuk do të vihet deri tek zgjedhjet e parakohshme, pasi që beson se deputetët e LSDM-së do të kthehen në kuvend.