Në USHT, hapet sot seminari i VIII-të ndërkombëtar i albanologjisë

Në seminarin në të cilin pritet të marrin pjesë studiuesit në zë të shkencave të albanologjisë, në boshtin e tij ka temën "Kultura shqiptare, pjesë e pashkëputshme e kulturës evropiane".

 

Studiuesit, përgjatë 2 ditëve sa do të zhvillohet seminari, do të mund të paraqesin kumtesat e tyre në katër sesione shkencore: në sesionin e gjuhësisë, sesionin e letërsisë, sesionin e historisë dhe atë të etnokulturës.

 

Sesioni i gjuhësisë do të ketë për temë "Arritjet dhe problemet aktuale e historike të gjuhës shqipe", kurse ai i letërsisë ka për temë "Relacionet e letërsisë shqipe".

 

Në sesionin e historisë do të shtrohet tema "Trojet shqiptare në kohën e sundimit osman", kurse sesioni i etnokulturës do zhvillojë punimet nën temën "Aspekte të trashëgimisë kulturore të shqiptarëve".

 

Organizator i seminarit është Universiteti Shtetëror i Tetovës. 

 

Ministri i Arsimit dhe Shkencës, Abdylaqim Ademi, do të marrë pjesë në Seminarin e VIII-të Ndërkombëtar të Albanologjisë, ndërsa më pas, në fshatin Negotinë, Komuna e Vrapçishtit, do ta vizitojë edhe sh. f. "Naim Frashëri".