IRI: Prijnë BDI dhe VMRO-DPMNE

Në një anketë të kryer në muajin shtator nga instituti prestigjioz amerikan, IRI, thuhet se të gjitha partitë politike kanë shënuar rënie të mbështetjes, ndërsa VMRO-DPMNE është partia e cila shënon rënien më të madhe prej 5 për qind.

 

Në anketën e Institutit Republikan Ndërkombëtar (IRI),  BDI shënon rënie me 1 për qind, po kështu edhe PDSH, ndërsa mbështetja për LSDM-në mbetet e njëjta.

 

Sipas të dhënave të anketës, VMRO-DPMNE qëndron më lart se të gjitha partitë e tjera dhe gëzon 29 për qind të mbështetjes, LSDM 10 për qind, BDI 13 për qind dhe PDSH 3 për qind.

 

Sa i përket mbështetjes së liderëve, besim më të madh tek qytetarët ka Nikolla Gruevski  me 22 %, Ali Ahmeti me 9 %, Zoran Zaev me 4 %, Gjorge Ivanov me 3 %, Branko Cërvenkovski 3 %, Menduh Thaçi, Rufi Osmani dhe Radmila Shekerinska me 2 %.

 

Në anketën e IRI-t qytetarët janë pyetur edhe nëse në zgjedhjet parlamentare ka pasur presione mbi votuesit, ku 72 % e qytetarëve kanë mohuar një gjë të tillë, 15 % e kanë thënë se presionet kanë ekzistuar dhe 7 % kanë thënë se i kanë ndjerë vetë presionet.

 

Ndërsa në pyetjen se cila çështje politike e jashtme është më shumë e rëndësishme , 28 % e qytetarëve kanë thënë se kjo është njohja e emrit kushtetues, 25 % janë përgjigjur se është çelja e negociatave me BE-në (integrimi në BE), 22 % mendojnë se është thithja e investimeve të huaja, 11 % vlerësojnë se është anëtarësimi në NATO dhe 8 % thonë se janë marrëdhëniet me fqinjët. 

 

Në anketën e IRI-t, qytetarët kanë  pasur mundësinë që të vlerësojnë  punën e institucioneve me notat prej 1 deri në 5, ku sipas qytetarëve, qeveria meriton notën 2.71, presidenti 2.8, ndërsa opozita 1.99.