Qeveria e re në Kosovë, më 6 janar Thaçi ia dorëzon mandatin Albin Kurtit

Presidenti i Kosovës, Hashim Thaçi, në adresimin e tij me rastin e fundvitit, ka bërë të ditur se kryetari i Lëvizjes Vetëvendosje, Albin Kurti, pas ftesës së tretë, është pajtuar që takimi ndërmjet tyre të mbahet të hënën, më 6 janar, në orën 15:00. 

 

“E mirëpres paktin që pas ftesës së tretë që zotëri Kurti i është përgjigjur ftesës për datën 6 janar në orën 15:00. Do ta pres në zyrën time, nuk mund të sillemi as me hatër. Mirë se vjen, e mirëpres.”,- tha presidenti i Kosovës, Hashim Thaçi.

 

Duke folur rreth formimit të qeverisë së re të Kosovës, presidenti Thaçi tha se pret që në javët e para të janarit të arrihet implementimi i tij, duke vënë kështu në vend vullnetin e qytetarëve.

 

“E di për vështirësitë për një arritje të një marrëveshje që janë normale dhe natyrisht partia fituese e përcakton partnerin. Kemi realitet tjetër politik në Kosovës. Çdo marrëveshje e mirëpres dhe do ta shtyj përpara. Është me interes të mos humbet kohë dhe mund të them se Kosova është në një stad të zhvilluar të themelimit të institucioneve dhe çdo marrëveshje që e bëjnë partitë politike do ta mirëpres.”,- u shpreh presidenti i Kosovës, Hashim Thaçi.

 

Duke e cilësuar 2019 si një vit me plot sfida, Thaçi ka shprehur besimin se 2020 do të jetë vit i tejkalimit të këtyre sfidave në rrugëtimin e Kosovës drejt Bashkimit Evropian dhe NATO-s.

 

Në adresimin e tij me rastin e fundvitit, kreu i Kosovës ka përmendur edhe punën për  thellimin e reformave demokratike dhe forcimit të Ushtrisë së Kosovës.