Maqedoni

Çulev: Ndërrim të 15 udhëheqësve të sektorëve në MPB

08.01.2020 16:21

Ministri teknik i punëve të brendshme, Naqe Çulev, parasheh ndërrimin e 15 kuadrove në pozita udhëheqëse në MPB....

Ministri teknik i punëve të brendshme, Naqe Çulev, parasheh ndërrimin e 15 kuadrove në pozita udhëheqëse në MPB, të cilët do kenë mandat deri në vërtetimin e rezultateve zyrtare të zgjedhjeve. Drejtuesit e rinj në sektorët kyç të MPB-së do të udhëheqin deri në shpalljen e zgjedhjeve të parakohshme parlamentare më 12 prill. Sistematizimi i ri do të kalojë në qeveri, por për emra konkretë ende vijojnë konsultimet përfundimtare.
 
“Në 15 vendet të cilat do të ndërrohen bëjnë pjesë 8 sektorë të punëve të brendshme, Reparti për Punë të Brendshme në Prilep, Reparti për Parandalimin e Kriminalitetit Serioz, Njësia Intervente Policore, Reparti për Operacione Speciale Policore, Reparti për Detyra Speciale, Reparti për Kontroll të Brendshëm dhe Reparti për Informatikë dhe Telekomunikime. Gjatë selektimit janë përzgjedhur kuadro profesional, të ndershëm dhe me integritet. Për emra konkret ende po vijojnë kontrollet dhe konsultimet shtesë.”,- tha ministri teknik i punëve të brendshme, Naqe Çulev.
 
Zgjedhjet e parakohshme, Çulev: Kush cenon procesin, do të dënohet
 
Gjatë zgjedhjeve të kaluara ka pasur tentime për manipulime zgjedhore, tha Çulev për TVM, andaj MPB planifikon shpërndarjen e forcave shtesë policore me qëllim të parandalimit të shkeljes së të drejtës zgjedhore, por edhe korruptimit të trupit votues.
 
“E shfrytëzoj këtë rast që të dërgoj mesazh deri tek individët apo grupet kriminele në vend dhe jashtë vendit se asnjë politikan nuk do të jetë garanci që ata të shpëtojnë nga ndjekja penale dhe procesuimi para organeve gjyqësore, nëse në çfarëdo lloj mënyre tentojnë të nëpërkëmbin të drejtën zgjedhore apo procesin zgjedhor.”,- tha ministri teknik i punëve të brendshme, Naqe Çulev.
 
Çulev pranon se rreziku nga migrimi ilegal edhe më tej është i pranishëm, rrezik shtesë ka edhe nga ekstremizmi i dhunshëm dhe radikalizmi fetar nga strukturat terroriste. Por, edhe përkundër kësaj, periudha parazgjedhore është e qetë dhe MPB është garanci për sigurinë e qytetarëve. 
 
FLUTURA LATIFI