Jankullovska: 3.2% më pak vepra penale në Likovë

SPB në Kumanovë, kohëve të fundit është duke shënuar rënie të veprave kundërvajtëse, si dhe siguri më stabile të rajonit, konstatoi ministrja e Punëve të Brendshme, Gordana Jankullovska, gjatë vizitës së sotme në Stacionin Policor në fshatin Mateç të Likovës.

 

Ajo, mes tjerash tha se numri i veprave penale në territorin e Stacionit Policor në Mateç është ulur për 3.2 për qind, kurse i kundërvajtjeve për prishje të rendit dhe qetësisë madje për 40 për qind krahasuar me vitin e kaluar. 

 

“Shifrat flasin se numri i veprave të regjistruara penale në Stacionin Policor në Mateç, në të gjitha 21 vendbanimet shënon ulje për 3.2 për qind, kurse i veprave kundërvajtëse për madje 40 për qind në krahasim me vitin e kaluar. Këto trende pozitive në rajonin e Stacionit Policor në Mateç janë në korelacion të drejtpërdrejt me përmirësimin e gjendjes në Sektorin për Punë të Brendshme në Kumanovë, ku numri i veprave penale shënon ulje për 17.5 për qind, kurse numri i veprave penale të zbardhura është mbi 50 për qind. Ndërkaq, numri i veprave kundërvajtëse për prishje të rendit dhe qetësisë në tërë rajonin shënon ulje prej 13.9 për qind”- deklaroi ministrja e Punëve të Brendshme, Gordana Jankullovska.

 

Ndryshe, Stacioni Policor në Mateç mbulon 21 vendbanime me 30.000 banorë.