BFI dhe O. H. “HILAL”, shpërndanë mish kurbani

Bashkësia Fetare Islame në bashkëpunim me Organizatën Humanitare “Hilal”, gjatë ditëve të festës së “Kurban Bajramit” shpërndanë mish kurbani për familjet e varfra dhe me nevoja të shumta. 

 

Dekani i FSHI-së, dr. Fahrudin Ebibi, në emër të kryetarit të BFI-së, Sulejman Rexhepi dhe O.H. “Hilal”, para mediave falënderoi të gjithë besimtarët myslimanë në vend dhe diasporë, të cilët ia besuan këtij institucioni përgjegjësinë për shpërndarjen e mishit të kurbanit.

 

“Si çdo vit dhe këtë vit, BFI, pjesën e cila nga perspektiva islame duhet t’i ndahet kategorisë që janë me gjendje sociale, këtë sot po e fillojmë për të vazhduar trendi dhe procesi edhe në qytetet tjera në ditët në vijim. Sot, në këtë vend, BFI, përmes shoqatave, përmes shërbimit do të bëjë ndarjen e 1500 pakove, kjo do të vazhdojë edhe në qytetet e tjera”- deklaroi dekani i Fakultetit të Shkencave Islame, Fahredin Ebibi.

 

Gjithashtu, nënkryetari i Shoqatës së Invalidëve “Shpresa” tha se nuk janë vetëm skamnorët ata që mund ta shfrytëzojnë këtë shpërndarje, por janë edhe personat me aftësi të kufizuara, gjegjësisht edhe anëtarët e kësaj shoqate.

 

“Shoqata “ Shpresa”, tashmë ka një bashkëpunim të shkëlqyer shtatë vite me radhë me BFI-në. Shpresojmë se ky bashkëpunim do të vazhdojë edhe në vitet e ardhshme, sepse anëtarët e shoqatës tonë kanë vërtetë nevojë për ndihmat tona”- tha nënkryetari i Shoqatës së Invalidëve “Shpresa”, Blerim Rexhepi.