Virusi Korona në Itali, rritet shqetësimi në Shqipëri

Me përhapjen e shpejtë të virusit Korona në Italinë fqinje, Shqipëria është përfshirë nga paniku dhe masa të shtuara sigurie.

 

Në mëngjes, ministrja e shëndetësisë, Ogerta Manastirliu, mblodhi task-forcën në Aeroportin ndërkombëtar të Rinasit, ku konfirmoi edhe njëherë që në Shqipëri nuk ka asnjë person të prekur me virusin vdekjeprurës.

 

Por, kreu i Partisë Demokratike, Lulzim Basha, kërkoi nga qeveria që ta menaxhojë si duhet situatën e rrezikut me koronavirusin.

 

Ndërkohë, fluksi i emigrantëve shqiptarë të mbërritur nga Italia drejt Shqipërisë është shtuar. Ata tregojnë se u është matur temperatura me të mbërritur në Aeroport.

 

Edhe në Portin e Durrësit dhe të Vlorës numri i mjekëve në gatishmëri është shtuar, por jo të gjithë shprehen se janë kontrolluar.

 

Ndërkaq, nëpër farmaci janë shtuar kërkesat për maska dhe gjithashtu edhe mungesa e tyre.