Virusi Korona në Shqipëri, 33 të prekur, ndalim-qarkullimi deri të dielën

Aktualisht janë të infektuar 33 persona, Fieri është qyteti ku janë shënuar 4 raste të reja, duke zgjeruar kështu hartën e të prekurve në 6 qytete.

 

Pozitiv ka rezultuar edhe një mjek nga Durrësi. 

 

“Në bazë të rezultateve që tashmë kanë dalë, nga kampioni i dytë i mostrave të marra, 39 mostra të mjekëve, infermierëve dhe pacientëve, vetëm 1 mjek rezulton pozitiv, i cili nuk ka simptoma, aktualisht është i vetizoluar dhe po hulumtohet më tej.  Nga numri total i të prekurve nga COVID-19 janë 25 persona të vetizoluar në gjendje të mirë shëndetësore dhe 177 të vetkarantinuar.”,- deklaroi zëvendësministrja e shëndetësisë, Mira Rakacolli.

 

E gjithë Shqipëria duket e shkretë pas vendimit të qeverisë për të ndaluar qarkullimin e të gjitha mjeteve private e publike deri të dielën në mesnatë.

 

Edhe dalja e qytetarëve është mjaft e rrallë.

 

Autoritetet qeveritare e shëndetësore kanë përsëritur thirrjen që qytetarët të qëndrojnë në shtëpi, si një masë për ndalimin e përhapjes së virusit Korona.