Virusi Korona, rritet numri i të infektuarve në Kosovë. Shkon në 55 numri i të infektuarve, Serbia shpalli gjendjen e jashtëzakonshme

Shumica nga personat janë të ardhur nga Italia. Edhe pse pacientët janë në gjendje stabile, autoritetet apelojnë të reduktohen daljet vetëm në rastet emergjente.

 

Kosova ka mbyllur edhe aeroportin e Prishtinës, duke pezulluar të gjitha fluturimet.

 

“Bazuar në rezultatet e testimeve u konfirmuan edhe katër raste të reja pozitive me COVID-19. Të katër rastet janë nga fshati Stubëll e Vitisë, familjarë të ngushtë të pacientit të diagnostikuar pozitiv me COVID-19, më datë 13.03.2020. E gjithë familja kanë qenë në vetizolim dhe Instituti Kombëtar i Shëndetit Publik ka bërë testimin edhe të familjarëve të tjerë. Në këtë situatë vetëdija dhe ndihma e juaj është e domosdoshme. Mbani distancë nga tjetri. Reduktoni daljet, veç në raste emergjente. Ndiqni rekomandimet nga Ministria e Shëndetësisë dhe Instituti Kombëtar i Shëndetit Publik.”,- deklaroi ministri i shëndetësisë i Kosovës, Arben Vitia.

 

Serbia ndërkohë ka shpallur  gjendje të jashtëzakonshme, pasi numri i të infektuarve u rrit edhe me shtatë të tjerë, duke shkuar në 55. Si masë për të luftuar virusin Korona, Serbia ka filluar atë që presidenti, Aleksandar Vuçiç, e ka cilësuar si  "betejë për të moshuarit".

 

“Nga e marta nuk do të ketë shkolla, kopshte, as fakultete , të gjitha do të mbyllen. Të gjitha hapësirat do të dezinfektohen. Nga e marta nuk do të ketë as sport, as palestër. Pushteti lokal do të kufizojë punën e restoranteve, kafeneve, mbyllet jeta, për të ruajtur jetën e prindërve tanë dhe të moshuarve.”,- deklaroi presidenti i Serbisë, Akesandar Vuçiç.

 

Serbia ka mbyllur kufijtë e Serbisë për të gjithë shtetasit e huaj, përveç për shtetasit serbë që kthehen nga jashtë, si dhe diplomatët dhe shtetasit e huaj që janë me leje qëndrimi në Serbi.