Kosovë, seancë kuvendore për shkarkimin e qeverisë

Kuvendi i Kosovës mban seancën për të shqyrtuar mocionin e mosbesimit ndaj Qeverisë së Republikës së Kosovës, propozuar nga Grupi Parlamentar i LDK-së. Seanca do të mbahet në bazë të kërkesës së 44 deputetëve.

 

Në seancën e sotme mediat dhe mysafirët nuk do të jenë të pranishme, pasi në hapësirat e tyre do të vendosen deputetët për të respektuar distancën mes njëri-tjetrit. Ndërkohë, përveç dezinfektimit të hapësirave, deputetët që në hyrje të sallës ku do të mbahen seanca, do të kontrollohen në mënyrë të detajuar, pas situatës së krijuar me koronavirus.

 

Kreu i LDK-së, Isa Mustafa, paraprakisht ka deklaruar se kryeministri i Kosovës, Albin Kurti ka nxitur veprimin e kësaj partie për mocion mosbesimi, me, siç është shprehur ai, sjelljet dhe veprimet e tij arbitrare dhe shkeljen e marrëveshjes qeverisëse.

 

“LDK nuk ka dy zgjidhje, Thaçin apo Kurtin, siç po shprehen disa. Por, e kanë një zgjidhje. E kanë vetëm LDK-në dhe Kosovën”, ka thënë Mustafa.