Shqipëri, 400 të infektuar nga virusi Korona

Në Shqipëri ka arritur në 400 persona numri i të prekurve nga Covid-19, pasi janë konfirmuar edhe 17 raste të reja në 24 orët e fundit. Po ashtu janë regjistruar edhe 23 të shëruar në 24 orë, duke e çuar në 154 numrin e të shëruarve në përgjithësi. 

 

“Deri në këto momente, 2989 raste të dyshuara prej të cilave të konfirmuara me Covid-19 janë 400 raste. Betejën me këtë sëmundje e kanë humbur fatkeqësisht 22 qytetarë, pavarësisht përpjekjeve të jashtëzakonshme të stafit mjekësor për t’ua shpëtuar jetën.”,- deklaroi drejtoresha e Institutit të Shëndetit Publik - Tiranë, Albana Fiço.

 

Në mesin e të shëruarve nga Covid-19 në Shqipëri është një mjeke dhe 4 infermierë, apo në total deri tani janë shëruar 27 mjekë dhe infermierë të personelit shëndetësor.

 

 

Por, derisa nga Shqipëria vijnë lajme të mira për shërimin e personelit mjekësor, nga Klinika për Sëmundje Infektive në Prishtinë njoftuan për pesë anëtarë të stafit të Klinikës të cilët janë të infektuar me virusin Korona, nga i cili deri më tani janë infektuar 184 qytetarë të Kosovës, 5 prej të cilëve kanë humbur jetën.

 

“Ashtu siç jeni të informuar, edhe zyrtarisht dje rreth orës 19 e 40 ka përfunduar me vdekje edhe një pacient 56 vjeçar nga Prishtina, i cili përveç infeksionit me Covid, ka qenë edhe me disa sëmundje tjera shoqëruese.”,- u shpreh drejtoresha e Klinikës Infektive – Prishtinë, Lindita Ajazaj – Berisha.

 

Autoritetet shëndetësore në Kosovë po ashtu bënë të ditur se tanimë është shëruar rasti i parë - pacienti zero, 77 vjeçari i cili ka pasur sëmundje kronike të mëhershme, por edhe infeksion shumë të rëndë me virusin Korona, por pas trajtimit mjekësor, pacienti është shëruar.