Shqipëri, shkon në 467 numri i të prekurve me “Covid-19”

Për herë të parë Shkodra ka tejkaluar kryeqytetin  me 13 raste të konfirmuara me COVID 19. Pjesë e listës së të prekurve tashmë janë edhe dy femijë si edhe një personel mjekësor.

Raste të reja në 24 orët e fundit janë shënuar 21, ndërsa në total 467 raste. Gjatë 24 orëve të fundit 15 pacientë i janë shtuar listës së të shëruarve, dke e çuar numrin total në 232.

“Janë testuar 193 persona të dyshuar, prej të cilëve janë konfirmuar 21 raste të reja me COVID-19, nga të cilët 1 personel shëndetësor dhe dy fëmijë asimptomatikë. Gjatë 24 orëve të fundit, 15 pacientë të tjerë i janë shtuar listës së të shëruarve, duke e çuar numrin e të shëruarve nga COVID-19 në 232. Harta e të prekurve nga COVID-19 zgjerohet në Tiranë me 6 raste, Shkodër 13 raste, Durrës me 1 rast dhe Hasi me 1 rast. Rastet e identifikuara në 24 orët e fundit janë kontakte të rasteve të mëparshme të prekura me COVID-19, ndërkohë që vazhdon procesi hetimit epidemiologjik në terren” – tha Drejtoresha e Institutit të Shëndetit Publik,  Albana Fico .

Ministria e Shëndetësisë dhe Mbrojtjes Sociale u ka kërkuar qytetarëve të vijojnë të respektojnë masat e distancimit social, pas vendimit për zgerimin e fashës orare të lëvizjes. (Luljeta Ndoka, TVM2)