Protesta në Gjermani, kundër masave të qeverisë për kufizime

Në disa qytete të mëdha gjermane, protestuan mijëra njerëz kundër kufizimeve të jetës publike.

Në Shtutgart, menjëherë pas fillimit të tubimit, u arrit  numri i aprovuar prej 5000 pjesëmarrësish. Edhe në Mynih, shumë më tepër njerëz se numri i lejuar prej 1 000 personave, donin të shkonin në Theresienwiese, ku zhvillohet çdo vit festa e famshme e birrës (Oktoberfest).

Por policia e kishte bllokuar territorin, prandaj edhe njerëzit në fillim u radhitën rreth e përqark zonës së protestës, derisa i shpërndau policia. Protestuesit ishin në përgjithësi paqësorë dhe iu përmbajtën kushtit të vënë nga Bashkia e Mynihut për të ruajtur distancën prej 1,5 metrash.

Tubime u zhvilluan edhe në qytete të tjera gjermane, si Berlin, Nuremberg, Leipzig, Bremen dhe Frankfurt. Në shumë vënde kishte edhe kundërprotesta. Në banderola shiheshin  mbishkrime si “Dinjiteti i njeriut është e mira më e madhe, jo shëndeti i tij”, “Maskat nuk ndihmojnë kundër gënjeshtrave” ose “Stop vaksinimit”.

Kundër-demonstruesit thërrisnin: “Nuk ka të drejtë për propagandë naziste”.

Shumë vëzhgues janë të shqetësuar se këto protesta mund  të shfrytëzohen nga djathtistët.