Prej 31 tetorit GPRS-KASA fiskale

Përkatësisht të gjithë konsumatorët që kalojnë qarkullim prej 10 milionë denarësh, përfshirë edhe shërbimet gastronomike dhe pikat e shitjes së karburanteve, do të duhet deri më 31 tetor të jenë të furnizuar me GPRS-kasa fiskale.

 

Sipas të dhënave të fundit të Drejtorisë për të Ardhura Publike, nga përafërsisht 8.900 taksa-pagues sa janë, vetëm 3.348 prej tyre deri më tani e kanë përmbushur këtë obligim ligjor.

 

“Po vërtetohet mentaliteti ynë, pritet java e fundit për t’i siguruar aparatet. Ne tani jemi në javën e fundit dhe të gjithë taksa-paguesit e mëdhenj, për të cilët përmbushja e afatit ligjor është fundi i këtij muaji, besoj se do ta përmbushin obligimin e tyre. Kemi kontaktuar me të gjithë. Informacionet nga tereni flasin se të gjitha firmat e mëdha janë në bisedime me shitësit e autorizuar dhe nga java e ardhshme do të vazhdojmë me taksa-paguesit e tjerë”- deklaroi drejtori i DAP-it, Goran Trajkovski.

 

Drejtori i Drejtorisë për të Ardhura Publike, Goran Trajkovski, ka paralajmëruar sanksione për të gjitha firmat të cilat nuk do të respektojnë afatin. 

 

“Nëse nuk sigurohen aparatet e reja, do të pasojnë dënime për mospasje të kasave fiskale”- tha drejtori i DAP-it, Goran Trajkovski.

 

DAP, beson se deri në fund të muajit të gjithë taksa-paguesit e mëdhenj do të pajisen me GPRS-kasat e reja fiskale. 

 

Ndërkohë, të gjitha firmat e tjera që nuk bien në kategorinë e taksa-paguesve të mëdhenj, do të duhet që këtë obligim ligjor ta përmbushin deri më 31 janar të vitit 2015.