Tiranë, Meta shpëton nga shkarkimi në Kuvend

Me 78 vota pro, 17 kundër dhe 8 abstenim Kuvendi i Shqipërisë ka miratuar raportin e Komisionit Hetimor që e shpëton Ilir Metën nga shkarkimi nga posti i Presidentit.

 

Raporti, puna e të cilit u mbyll vetëm me propozimin për një ligj organik që e kufizon presidentit të dalë nga kornizat kushtetuese, u miratua vetëm me votat e shumicës socialiste, pasi opozita parlamentare kërkon shkarkimin e kreut të shtetit.

 

Gjatë diskutimeve të raportit, kryeministri Edi Rama lëshoi akuza të ashpra ndaj presidentit, por sipas tij komisioni i Venecias nuk ka rekomanduar shkarkimin. 

 

I ashpër ka qenë reagimi i kreut të grupit parlamentar demokrat Myslym Murrizi, duke i quajtur zyrtarët e mazhorancës dhe presidentin, ortakë.

 

Gjatë seancës plenare Rama u ndal edhe te reforma zgjedhore, duke deklaruar se ndryshimet kushtetuese do të miratohen në seancën e 30 korrikut, do apo s’do opozita.