Covid-19, 10 viktima në Kosovë, kurse dy viktima në Shqipëri

Autoritetet shëndetësore në Kosovë kanë bërë të ditur se edhe 10 persona të infektuar me virusin Korona kanë vdekur, duke e çuar në 448 numrin e viktimave nga ky virus.

Bazuar në të dhënat e fundit të Institutit Kombëtar të Shëndetësisë Publike në Kosovë edhe 162 raste të reja janë diagnostikuar pozitiv me virusin Korona, derisa numri i tyre ka shkuar në 12.168. Rastet e reja pozitive janë nga komuna të ndryshme të Kosovës nga të cilat me numër më të madh janë regjistruar në komunën e Prishtinës. 220 pacientë janë shëruar duke e rritur  numrin e përgjithshëm i të shëruarve në  8.149, numri i rasteve aktive është 3.571.

Në Shqipëri, autoritetet shëndetësore njoftojnë për 2 viktima, duke e quar në 240 numrin e vdekjeve që nga fillimi i pandemisë, janë regjistruar edhe 152 raste të reja me Covid-19 në 24 orët e fundit.

“Pavarësisht përpjekjeve të mjekëve, fatkeqësisht në dy spitalet COVID, nuk e kanë fituar dot betejën me sëmundjen 2 pacientë, një 61 vjeçar nga Korça dhe një 83 vjeçar nga Mirdita, me sëmundje bashkëshoqëruese. Aktualisht, në Spitalin Infektiv dhe “Shefqet Ndroqi” po trajtohen 137 pacientë të konfirmuar pozitivë me COVID-19, 24 në terapi intensive nga të cilët 7 pacientë janë të intubuar.”,- u shpreh Marjeta Dervishi nga Instituti i Shëndetit Publik.

Në 24 orët e fundit në Shqipëri janë shëruar 110 pacientë, duke e çuar numrin e të shëruarve në 4096 që nga fillimi i pandemisë. Aktualisht janë 3783 raste aktive. (Farije Dauti Bakiju, TVM2)