Nis me punë Qeveria e re, Zaev: Mandat i papërsëritshëm

 

“Katër vitet para nesh janë të papërsëritshme. Ne dimë mirë këtë dhe nuk do të lëshojmë shansin dhe besimin që na është dhënë. Në vitet që vijnë, vazhdojmë me vënien e standardeve evropiane në vend, për transformimin e vendit tonë për më mirë, në të gjitha sferat. Do ta përmbyllim me një sukses tjetër tregimin tonë euro-atlantik me anëtarësim në BE. Në katër vitet e ardhshme do të hapim 80% të kapitujve negociues, ndërsa qëllimi është që për 6 vite të përmbyllim të gjithë kapitujt.”,- tha kryeministri, Zoran Zaev.

 

 

Ndërkaq, ministrat shqiptarë në kabinetin e kryeministrit, Zoran Zaev, filluan detyrën me një takim koordinues, të realizuar para pranimit tradicional te presidenti i republikës. Pavarësisht takimit ndaras, zëvendëskryeministri i parë, Artan Grubi, tha se janë një me ministrat e LSDM-së dhe se vendimmarrja për zbatimin e programit qeveritar do të jetë me konsensus.

 

“Presim që bashkërisht, bashkë me kolegët tanë nga LSDM, si dhe ministrat e tjerë të zgjedhur, ta zbatojmë programin të cilin e miratoi Kuvendi i Maqedonisë së Veriut, në përpikëri dhe në përputhshmëri me të gjitha pritjet e qytetarëve. Në marrëveshjen e koalicionit, por edhe në programin qeveritar, parimi i konsensualitetit dhe i vendimmarrjes konsensuale, i demokracisë konsensuale, është një nga shtyllat e demokracisë konsensuale të atij programi.”,- u shpreh zëvendëskryeministri i parë shqiptar, Artan Grubi.

 

Në kuadër të reformave të paralajmëruara në administratë, Grubi paralajmëroi sistematizimin e rreth 1400 të punësuarve, sipas MO-së, brenda 6 muajve të parë të qeverisjes.