Botë
Kosovë, institucionet mirëpritën marrëveshjen
04.09.2020 21:36
Në Kosovë udhëheqës institucionesh e partish politike në pushtet mirëpritën marrëveshjen e nënshkruar në Shtëpinë e Bardhë...
Presidenti Hashim Thaçi thootë se Kosova beson në udhëheqjen e Shteteve të Bashkuara të Amerikës dhe në vizionin e Washingtonit, meqë “gjatë gjithë historisë së Kosovës kjo i ka sjellë vetëm përfitime, si çlirimin dhe pavarësimin e Kosovës, themelimin e ushtrisë që do të përfundojë me integrimin në NATO, si dhe tash edhe zhvillim ekonomik”.
Kryetari i Lidhjes Demokratike të Kosovës, Isa Mustafa tha se Kryeministri dhe Qeveria, me maturi e përkushtim, në pak javë, arritën ta ribëjnë Kosovën partner të besueshëm të aleatëve tanë strategjikë, SHBA dhe BE, prandaj ky Kryeministër dhe Qeveria e tij meritojnë mbështetje në rrugëtimin që kanë nisur”, tha Mustafa.
Kryetari i Aleancës për Ardhmërinë e Kosovës, Ramush Haradinaj e përshëndeti marrëveshjen rreth së cilës kishte shprehur dyshime për shkak të përfshirjes së çështjes së liqenit të Ujmanit që ndodhet në veriun e Kosovës. Nisma Socialdemokrate tha se “marrëveshja që parasheh investime miliardëshe në shumë fusha është e mirëpritur për Kosovën.
Ndërsa, Partia Demokratike e Kosovës në opozitë kritikoi delegacionin e Kosovës për humbje të mundësisë për një marrëveshje përfundimtare që siguron njohjen e ndërsjellë dhe ulësen në OKB “Marrëveshjet që nuk parashohin njohje të ndërsjellë, nuk ofrojnë zgjidhje të problemit mes Kosovës dhe Serbisë”, thuhet në reagimin e Partisë Demokratike.