Shqipëri, dy të vdekur e 150 të infektuar nga Covid-19; Kosovë, dy të vdekur e 79 raste pozitive me Kovid-19; Botë, vazhdon të rritet numri i të infektuarve

Në Shqipëri, gjatë 24 orëve të fundit kanë ndërruar jetë dy persona, 150 kanë rezultuar pozitiv dhe 55 qytetarë janë shëruar duke e çuar në 6995 që nga fillimi i epidemisë. 

 

“Aktualisht në Spitalin Infektiv dhe “Shefqet Ndroqi” po trajtohen 189 pacientë, 16 në terapi intensive, nga të cilët 5 pacientë janë të intubuar. Në 24 orët e fundit, kemi pasur dy humbje jete, një 75 vjeçar nga Tirana dhe një 85 vjeçar nga Shkodra.”,- deklaroi Rovena Daja nga Instituti i Shëndetit Publik.

 

Në 24 orët e fundit nga Covid-19 në Kosovë janë regjistruar 79 raste pozitive dhe dy viktima, ndërsa janë shëruar 104 pacientë të cilët numrin e përgjithshëm të të shëruarve e çojnë në 12.674, kurse numri i rasteve aktive është 1.853. Numri total i rasteve pozitive arrin në 15.142 raste nga 62.607 persona të dyshimtë dhe 615 viktima. 

 

Franca vijon të regjistrojë shifra të larta të personave të prekur nga COVID-19, ku gjatë 24 orëve të fundit janë konfirmuar 10, 500 ndërsa në Gjermani janë shënuar 922 raste të reja me çka numri i përgjithshëm i të prekurve shkoi në 272,337, ndërsa fatmirësisht nuk është shënuar asnjë viktimë. 

 

SHBA-të në botë mbajnë rekord me numrin e të infektuarve, më shumë se 6.7 milionë njerëz kanë rezultuar pozitiv, ndërsa mbi 199 400 kanë humbur jetën. 

 

Në Indi shënohen 93.337 raste të reja, derisa me 1.247 vdekjet e fundit numri i viktimave është rritur në 85.619. 

 

Ministria e Shëndetësisë së Brazilit njoftoi se me 39.797 raste të reja ka arritur në 4.495.183 numri i të prekurve, ndërsa me 858 vdekje të reja numri i viktimave ka shkuar në 135.793. 

 

Në Rusi njoftohet për 71 vdekje të cilat e çojnë në 19.489 numrin e viktimave, derisa 6.196 rastet e reja e çojnë në 1.109.595 numrin e përgjithshëm të të prekurve. 

 

Në Meksikë, 624 rastet e reja kanë rritur numrin e viktimave në 72.803, ndërkaq me 4.841 raste të reja, numri i të infektuarve është rritur në 688.954. Me 229,487 raste e reja të të prekurve me Covid-19 në botë gjatë 24 orëshit të fundit numri i përgjithshëm arrin në 31 milion dhe më shumë se 960 mijë viktima.