Strugë – Ohër, migrimi ul numrin e nxënësve në klasat e para

 

“Po, është e vërtetë që ka rënë numri i fëmijëve që janë të regjistruar në klasat e para, është diku 40 në kuadër të komunës, kjo si rezultat që gjithë tani e dimë trendin që e gjithë rinia lëvizin në Evropë, është trend ballkanik. Si rezultat i kësaj personat që ikin andej mendojnë që të vendosen andej dhe i marrin dhe familjet e tyre.”,- deklaroi udhëheqësi i Sektorit për arsim dhe shkencë – Strugë, Dashmir Nasufi.

 

Rënie të numri të filloristëve ka edhe në shkollat fillore në Ohër, por janë regjistruar vetëm 3 nxënës më pak se vitin e kaluar. 

 

“Në këtë vit shkollor në Ohër janë regjistruar 480 nxënës të klasave të para ose vetëm tre më pak se vitin e kaluar, kur kishte 483. Kemi një rënie më të madhe të nxënësve të regjistruar në shkollat e mesme. Vitin e kaluar 558 nxënës u regjistruan në shkollën e mesme, ndërsa këtë vit 508, ose 50 nxënës më pak.”,- u shpreh zëdhënësi në komunën e Ohrit, Tome Xhamtoski.

 

Në disa fshatra të Strugës ka edhe rritje të numrit të nxënësve në klasë të parë. Në fshatin Ladorisht janë regjistruar 15 nxënës më tepër se vitin e kaluar dhe në fshatin Veleshtë janë regjistruar 5 nxënës më tepër. Ndërsa në një fshat në Ohër këtë vit nuk është regjistruar asnjë nxënës në klasë të parë.