Botë
Londër, nis testimi për virusin Korona në aeroport
20.10.2020 11:17
Pasagjerët që do të udhëtojnë nga Aeroporti Heathrow i Londrës drejt Hong Kongut dhe Italisë të martën...
Pasagjerët që do të udhëtojnë nga Aeroporti Heathrow i Londrës drejt Hong Kongut dhe Italisë të martën, do të jenë të parët që kanë mundësinë e kryerjes së testit të shpejtë për koronavirus para nisjes. Ky test do të kushtojë 80 funta, derisa rezultati i tij bëhet i ditur brenda 20 minutash. Qëllimi i kryerjes së këtij testi është që t’iu ndihmojë njerëzve të udhëtojnë në vendet ku kërkohet rezultat negativ i testit për këtë virus.
Një numër në rritje i shteteve kanë klasifikuar Mbretërinë e Bashkuar si vend me “rrezik”, që nënkupton se udhëtarët nga ky vend përballen me më shumë kufizime. Autoritetet në Hong Kong tani u kërkojnë njerëzve që udhëtojnë nga Londra të prezantojnë testin për koronavirus, të kryer brenda 72 orëve.
Testi i shpejtë me pështymë, që tani është i qasshëm në dy terminale në Heathrow të Londrës, njihet si testi Lamp. Ky test është më i shpejtë sesa ai PCR, meqë mostrat nuk duhet të dërgohen nëpër laboratorë. Zyrtarët e kësaj kompanie kanë thënë se kryerja e testimeve do të krijojë siguri për udhëtarët, të cilët gjatë udhëtimit më pas do të jenë të sigurt nga COVID-19.