Së shpejti nis zgjerimi i sheshit “Skënderbeu”

Komuna e Çairit tanimë është pajisur me të gjitha lejet dhe pëlqimet e nevojshme për zgjerimin e këtij sheshi dhe bëjnë  përgatitjet e fundit për të nisur punën në terren.

 

Pothuajse është gjithçka gati, inspektorët dhe arkitektët janë çdo ditë në mbikëqyrje të terrenit, të cilët në këtë fazë parashikojnë zgjerimin e sipërfaqes së sheshit për plus 6 mijë metra katror, vend i cili do të dedikohet për pushime dhe shëtitje.

 

“Punimet për fazën e dytë të sheshit “Skënderbeu” duhet të fillojnë afërsisht  brenda 10 ditëve. Për momentin kemi marrë lejen e ndërtimit nga Qyteti i Shkupit. Jemi në pritje të marrim edhe një leje sa i përket regjimit kohor të komunikacionit dhe pasi që ta marrim edhe këtë leje, fillojmë me punimet”- deklaroi udhëheqësi i sektorit për urbanizëm në Komunën e Çairit, Xhengiz Hani.

 

Sheshi i ardhshëm për më pak se 16  muaj do të shtrihet prej Qendrës Tregtare “Ura” deri  tek  udhëkryqi  i bulevardit “Goce Delçev”.  

 

Projekti  i zgjerimit të sheshit “ Skënderbeu”  do të  bëhet gjatë muajve të ardhshëm. Ndërtimi i fazës së dytë të sheshit nënkupton mbulimin e bulevardit “Goce Delçev”, pra do të ndërtohet shesh sipas shembullit të metropoleve evropiane.

 

Qytetarët e anketuar të TVM-2 e mirëpresin realizimin e këtij projekti, duke vlerësuar se një shesh i zgjeruar dhe më i madh do të jetë  një kartë identiteti për të gjithë shqiptarët e vendit.

 

“Normal se çdo qytetar ka nevojë për shesh,  sidomos ne që  s’jemi të Shkupit  dhe vijmë prej Durrësit, duam të shohim shesh pak më të madh”- u shpreh një turist nga Durrësi.

 

“Është mirë të bëhet, gjithçka që bëhet është mirë”- tha një qytetar.

 

“Po, me ndërtimin e sheshit me siguri do të ketë më shumë dyqane, më shumë punësime, mendoj se do të jetë më mirë”- theksoi një qytetar.

 

Ndërtimi i fazës së dytë të sheshit “Skënderbeu” kap vlerën prej 10 milionë euro, para të cilat janë siguruar nga buxheti i shtetit. Kompania e cila do të jetë përgjegjëse për punimet në shesh është kompania “BAUER  MK”.