Kriza ekonomike nga Covid-19, 31 milionë euro kredi pa kamatë nga BE për biznesin

 

“Vetëm se më nga dita e sotme kemi filluar t’i pranojmë aplikimet nga ana e bizneseve, është një masë shumë e rëndësishme në këtë kohë me të vetmin qëllim, që t’iu dalim në ndihmë të gjitha kompanive, në veçanti kompanive mikro, të vogla dhe zejtarëve, që të shfrytëzojnë këto mjete që të rrisin konkurrueshmërinë e tyre, të ruajnë vendet e tyre të punës, por njëkohësisht që t’iu ndihmojmë kompanive që janë të orientuara në eksport.”,- deklaroi ministri i ekonomisë, Kreshnik Bekteshi.

 

Kërkesa nga ana e kompanive për të shfrytëzuar këtë kredit është shumë më e madhe nga ato që ishin paraprakisht, theksoi drejtor i Bankës për Zhvillim të Maqedonisë së Veriut, Naumov.

 

“Duhet të pranoj se numri i e-mailave që kanë arritur deri tek ne ka tejkaluar pritshmëritë tona dhe janë 8 herë më tepër sesa për Covid-2. Nga ajo që kemi parë deri më tani nga kërkesat për kreditë ka edhe nga subjekte të cilat nuk janë të përfshira në këtë thirrje, pra nuk janë lloj i kompanive mikro, apo të vogla, apo zejtarë. Kjo edhe më shumë e rëndon sistemin tonë, por ne nuk mund t’iu ndalojmë mundësinë për të aplikuar.”,- tha drejtori i Bankës për Zhvillim të Maqedonisë së Veriut, Kire Naumov.

 

Bekteshi gjithashtu theksoi se pas masave që do të hyjnë në fuqi nga 18 dhjetori për objektet hotelerike do të shqyrtohet një mbështetje shtesë financiare për humbjet si pasojë e këtyre masave në këtë sektor. Nga vendimi i fundit qeveritar që mbyllja të jetë nga ora 18 përfshin të gjithë objektet që shërbejnë ushqim ose pijë përfshirë këtu edhe ato që janë në kuadër të kazioneve.