Ndryshimet në Qeveri dhe zhvillimet për vrasjen e Klodian Rashës

Kryeministri, Edi Rama, ka firmosur ndryshimet më të fundit në qeveri, pas dorëheqjes së ministrit të brendshëm, Sandër Lleshaj.

Në vend të tij është emëruar ministri aktual i Bujqësisë, Bledi Çuçi, vendin e të cilit do ta zërë ish-ministrja e Ekonomisë, Milva Ekonomi.

Dorëheqja e Lleshajt, erdhi pas ngjarjes së rëndë të 8 dhjetorit, kur efektivi i Policisë, Nevaldo Hajdaraj, qëlloi për vdekje të riun, Klodian Rasha.

Ndërkohë, ditën e sotme Prokuroria e Tiranës ka vendosur të ashpërsojë akuzën ndaj efektivit në “vrasje me dashje”, duke rrezikuar 20 vjet burg.

Protestat për vrasjen e 25-vjeçarit nuk janë ndalur që prej ditës kur ai u ekzekutua, duke degjeneruar në përplasje te dhunshme mes protestuesve dhe forcave policore. Ndonëse këto të fundit janë përpjekur t’i shpërndajnë edhe në kuadër të masave kufizuese të Covid-19, komisionerja për të drejtat e njeriut, Dunja Mijatoviç, i ka kërkuar sot qeverisë shqiptare që të mos i pengojë tubimet paqësore.  (Luljeta Ndoka, TVM2)