Pagesa prej 6 mijë denarëve, bankat i përgjigjen qeverisë, kërkojnë afat të ri

 

“Në këtë periudhë të shkurtër, me sukses u janë paguar mbi 90 për qind të përfituesve të ndihmës financiare. Shoqata e Bankave të Maqedonisë informon publikun se anëtarët tanë – bankat, si edhe deri tani, janë të gatshme me të gjitha burimet e tyre të përmbushin projektet me interes publik, veçanërisht ato të destinuara për kategoritë e qytetarëve përfitues të ndihmës sociale. Në këtë mënyrë, aktivitetet duhet të jenë gjithmonë brenda rregulloreve ligjore. Në atë kuptim, pas skadimit të afateve të dhëna ligjërisht, për të realizuar pagesën e të gjithë qytetarëve të cilëve nuk u është paguar mbështetja financiare në afatin e paraprak ligjor, është e nevojshme të bëhen ndryshime në Ligjin për mbështetje financiare në mënyrë që afatet ekzistuese të zëvendësohen me afate të reja më të gjata”, thuhet në kumtesën e Shoqatës së Bankave të Maqedonisë.

 

Shumë qytetarë janë ankuar se nuk kanë mundur t’i tërheqin paratë për shkak të xhirollogarive të bllokuara nga përmbaruesit, derisa një pjesë e tyre nuk kanë arritur t’i azhurnojnë të dhënat e tyre, por nga Shoqata e Bankave theksojnë se për këtë ndihmë bankat i  kanë vënë në dispozicion në maksimum burimet e tyre dhe se deri në fund të orarit të punës më 25 dhjetor i kanë kryer shpërndarjet e fondeve në llogaritë e qytetarëve. Nga kjo masë e Qeverisë në kuadër të pakos anti-krizë përfitojnë  283 mijë qytetarë edhe atë nga 6000 denarë. Këtu përfshihen qytetarët me të hyra të vogla, qytetarët me pensione të ulëta, përdoruesit e ndihmës sociale, të rinjtë të moshës prej 16-29 vjet, artistët dhe personat të tjerë të përfshirë në veprimtarinë e kulturës, punonjësit e filmit artistët e estradës.