ShBA, virusi Corona, mbi 400,000 persona të vdekur

Vdekjet e lidhura me COVID-19, sëmundjen që shkakton koronavirusi, kanë arritur në 400,000 në Shtetet e Bashkuara, ndërkohë që numri total i të infektuarve shkon përtej shifrës 24 milionë, sipas të dhënave të Universitetit “Johns Hopkins”.

Vdekjet e lidhura me koronavirus janë duke shënuar rritje në dy të tretën e shteteve amerikane, ndërkohë që ka nisur të raportohet edhe për variante të reja të këtij virusi.

Më 18 janar, Kalifornia është bërë shteti i parë amerikan që ka regjistruar 3 milionë të infektuar me koronavirus, prej kur ka shpërthyer pandemia.

Deri më 17 janar, Kalifornia, shtet me 40 milionë banorë, ka regjistruar 36,633 vdekje të lidhura me COVID-19.

Ndërkohë, guvernatori i Nju Jorkut, Andrew Cuomo, u ka bërë thirrje autoriteteve federale që të kufizojnë udhëtimet nga vendet kur janë regjistruar variantet e reja të koronavirusit, përfshirë Britaninë e Madhe, Afrikën Jugore dhe Brazilin.