Takimi Osmani – Korçok, Sllovakia mbështet eurointegrimin e vendit

 

“Po inkurajoj qeverinë tuaj dhe qytetarët të vazhdojnë me reformat, pasi që kjo është më e rëndësishmja se çfarë ju bëni me zgjedhjen tuaj që të bëheni anëtare e Unionit. Këtë nuk e bëni për burokracinë, por për qytetarët tuaj. Do duhet t’u shpjegojmë qytetarëve se s’do ketë vende pune pa sundimin e së drejtës. Kjo është e rëndësishme si për Maqedoninë e Veriut ashtu edhe për gjitha vendet në BE.”,- tha ministri i Jashtëm i Sllovakisë, Ivan Korçok.

 

Në takim Osmani ka njoftuar homologun e tij për hapjen e ambasadës në Bratislavë. Kjo, sipas Osmanit, do të ndikonte në përforcimin e bashkëpunimit politik, por edhe ekonomik me Sllovakinë. Osmani është shprehur i qartë në plotësimin e kritereve europiane për anëtarësim të vendit në Union.

 

“Biseduam për nevojën që Maqedonia e Veriut urgjentisht të fillon me bisedimet për anëtarësim për shkak se ka plotësuar gjitha kriteret politike, ekonomike, ka zgjidhur gjitha çështjet kontestuese të cilat mbanin peng këtë rrugëtim me qëllim jo vetëm për të përforcuar jo vetëm kredibilitetin e BE–së, por edhe parimin e kondicionalitetit që nënkupton e vlerësimi të bëhet sipas sistemit të meritave.”,- u shpreh ministri i punëve të jashtme, Bujar Osmani.

 

Dy ministrat janë dakorduar në shpeshtimin e takimeve të komisionit të përzier për çështje ekonomike. Diplomati sllovak Korçok me vizitën në Shkup nis turin ballkanik. Në Shkup ka sjellë edhe katër sisteme të respiratorëve, donacion në përballjen me pandeminë.