Shqipëria humbi nga Italia, por nuk u korrit

Golin e vetëm axurët e realizuan nëpërmjet Okakas në minutën e 80, mirëpo deri në ato momente Shqipëria me një mbrojte të mirë, sidomos me performancat e mira të portierit Etrit Berisha, tregoi se nuk është ekip për tu nënvlerësuar. Pjesa e parë përfundoi pa gola, por me raste.

Vlen të ceket një goditje e fortë e Cikalleshit, që la veç të mposhtur Sirigun, por topi për fatin jo të mirë të Shqipërisë, përfundoi në shtyllë. Në fillim të pjesës së dytë për Italinë rrezikoi Giovinco, por tentimin e tij e priti me lehtësi Berisha që tregoi një formë të jashtëzakonshme.

Po zhvillohej minuta e 50 kur pas presionit të kuqezinjve gaboi portieri Sirigu, i cili nuk e largoi mirë topin për t’ia mundësuar Lenjanit një rast të mirë, por ai nuk arriti ta kontrollojë topin mirë për ta bllokuar mbrojtësit italianë.  

Dhjetë minuta më vonë Italia nisi një aksion të mirë nëpërmjet Cercit. Cerci në kundërsulmin tjetër rrezikoi me një goditje dinake që si zakonisht përfundoi në duart e Berishës. Berisha edhe një herë shfaqi cilësitë e tij kur në minutën e 70 me një pritje të mrekullueshme nuk lejoi golin nga Stefano Okaka.

Për pesë minuta u ndalua loja shkaku i lëndimit të Elseid Hysajt dhe këtë e shfrytëzuan dy-tre tifozë shqiptarë që pushtuan fushën.

Në minutën e 82-të kapitulloi portieri Berisha. Okaka realizoi me kokë pas harkimit nga këndi, duke mposhtur portierin shqiptar që u bëri ballë dhjetëra sulmeve të italianëve deri në momentin e pësimit të golit.

Në fund, edhe përkundër humbjes, Shqipëria regjistroi një paraqitje tjetër mjaft të mirë, e cila jep shpresa para vazhdimit të kualifikimeve, në mars të vitit të ardhshëm.