Sedllarvcë, banorët protesta kundër pikë-pagesës

Kanë protestuar sërish banorët e fshatit Sedllarcë kundër pikë-pagesës në dalje të Tetovës, duke kërkuar nga drejtuesit e institucioneve përgjegjëse që sa më shpejtë të bëhet një zgjidhje për këta banorë, pasi, siç shprehen ata, kanë pasur rrugën lokale, por ndërtimi i autostradës Tetovë- Gostivar e ka shkatërruar.

 

Banorët e Sedllarcës nuk kërkojnë që të largojnë tërësisht pagesën, por e njëjta të paguhet aq sa e shfrytëzojnë.

 

 

“Kërkesat tona janë të qarta, të paguhet sa shfrytëzohet autostrada, ose rrugën alternative që ekziston vetëm që duhet të rregullohet. Kërkesa është bërë për zgjidhje të këtij problemi, ndërsa përgjigjja e tyre është kthyer dhe na kanë treguar si është ligji. Deri në Gostivar është 30 denarë nga 20 km, deri tek ne 3.5 km diku 6-7 denarë.”,- u shpreh një protestues.

 

“Ne kërkojmë ose të largohet pagesa ose të bëhet 10 denarë, sa na takon, ose le ta rregullojnë rrugën që e kemi pasur, kjo nuk është as autostradë, ne nuk kërkojmë shumë, ne kërkojmë atë çka është e jona. Fshati ynë është shumë afër Tetovës dhe ne nuk kemi mundësi të paguajmë ka 30 denarë shkuarje-ardhje.”,- tha një protestues.

 

Protestuesit paralajmëruan se nëse institucionet nuk ndërmarrin masa, ata do të radikalizojnë protestat, duke bllokuar tërësisht autostradën Tetovë-Gostivar.