Moti, RMV e kapluar nga bora dhe nga temperaturat e ulëta

Prej mbrëmë në mbarë vendin po mbretëron mot me reshje të borës dhe temperatura të ulëta. Sipas meteorologëve, këtë mëngjes temperaturat ishin prej minus 11 deri në minus 6 gradë celsius.

“Këtë mëngjes temperaturat minimale ishin në interval prej minus 11 deri në minus 6 gradë celsius. Trashësia e borës këtë mëngjes ishte 65 centimetra në Kodrën e Diellit, 38 në Mavrovë, 36 në Krushevë, 33 centimetra në Manastir dhe Dibër, 23 në Pretor, 22 centimetra në Ohër dhe Prilep, 20 në Berovë, 14 në Shkup dhe 9 centimetra në Kumanovë. Reshjet do të ndërpriten në fund të ditës ndërsa më të pranishme do të jenë në pjesën jugore të vendit.”,- u tha nga Enti Hidrometeorologjik.

Për shkak të reshjeve të mëdha është vendosur ndalesë për automjetet e rënda në rrugën Kërçovë-Ohër, përmes rrugës malore Preseka, në rrugën Resnjë-Ohër, përmes rrugës malore Bukovo, ndalesë për kamionë është vendosur edhe në rrugën Dibër-Strugë dhe anasjelltas. Ndalesë për qarkullim të automjeteve të rënda ka edhe për rrugët: Manastir-Resnjë, për rrugën Makedonski Brod-Prilep. Kamionët nuk mund të qarkullojnë edhe në rrugën Strugë-Qafthanë, ndërsa makinat e thjeshta detyrimisht duhet të kenë pajisje dimërore. Ndalesë për qarkullim të automjeteve të rënda ka edhe për rrugën Gostivar-Kërçovë, përmes Strazhës dhe për rrugën Mavrovë-Dibër.

Ndërkohë, kreu i komunës së Shkupit, Petre Shilegov, përmes një postimi në rrjetet sociale ka deklaruar se të gjitha rrugët dhe bulevardet në Shkup janë pastruar pas reshjeve të borës.

Nga e hëna pritet të kemi mot të qëndrueshëm, kryesisht të ftohtë. Temperaturat e mëngjesit deri të mërkurën në pjesën më të madhe të vendit do të jenë nën -10 gradë, ndërsa në disa vende në -15 gradë celsius. Sipas meteorologëve, ngrohja graduale do të nis nga dita e enjte. (Rejhane Bushi – Metaj, TVM2)