Shqipëri, përmbytje nga shirat, 3 të vdekur

Babë e bijë janë rrëmbyer nga ujërat e shiut mbrëmjen e djeshme, duke humbur jetën në rrethin e Kurbinit. Ndërsa një i ri po në këtë zonë ka humbur jetën, pasi është rrëzuar te ura në të cilën ai po kalonte.

 

Situatë më problematike është paraqitur në zonën e Lezhës, aty ku ka zbarkuar ministrja e Mbrojtjes, Mimi Kodheli, ministri i Brendshëm, Saimir Tahiri dhe ai i Bujqësisë, Edmond Panariti.

 

Zëvendëskryeministri, Niko Peleshi, i cili ndodhet në krye të Grupit të Emergjencës për Përballimin e Situatës, pasi ka ngushëlluar familjet e viktimave për humbjen e rëndë, ka folur mbi situatën në zonat e përmbytura.

 

Gjatë ditës së sotme, situata është paraqitur më e normalizuar, por shqiptarët luten që të mos ketë më reshje, pasi banesat e tyre rrezikojnë të dalin jashtë përdorimit.

 

E gjithë situata kritike është krijuar pas vetëm pak orë reshjesh, çka tregon për infrastrukturën e dobët të kanaleve të kullimit.