Kërçova shënon Ditën e Arsimit Shqip, përkujtohen misionarët e arsimit

 

E veçanta e kësaj dite është e kaluara jonë plot vuajtje dhe sakrificë, plot dritë, shpresë dhe krenari, tha kreu i komunës së Kërçovës, Fatmir Dehari, gjatë përurimit të këndit përkujtimor dhe bibliotekës së Shkollës “Naim Frashëri” që mban emrin e misionarit të arsimit shqip, Pertef Therepeli, babait të shkollës së Jagollit dhe të shkollave të këtushme shqipe, mësuesit dinjitoz që erdhi nga Skrapari i Shqipërisë, për të mbjellë dritën e diturisë në hapësirat tona.

 

Në shenjë nderimi për kontributin e dhënë në edukimin e gjeneratave të reja, kryetari Dehari, me këtë rast i ndau vlerësimin “Post Mortum” zonjës Axherka Mediu, mësueses së parë shqiptare në rrethin e Kërçovës gjatë vitit 1945/46.

 

Në këtë ditë të shënuar të arsimit shqip, sot u promovuan edhe dhomat senzorike në kopshtin e qytetit dhe në Shkollën Fillore “Sande Shterioski”.

 

Duke i përgëzuar të gjitha gratë me rastin e Ditës Ndërkombëtare të Gruas, kryetari Dehari dekoroi zonjën Sanije Sadiku, femrën e parë shqiptare e cila në dy mandate qeverisi me ish komunën e Osllomesë gjatë periudhës 2005-2013, duke dhënë mesazhin e përfaqësimit të mirëfilltë të femrës shqiptare në institucionet e vendimmarrjes. 

 

Ndërkaq në shenjë nderimi të festës së 8 Marsit,  kryetarja e degës së BDI-së, Ardita Dani, dhe kryetarja e forumit të gruas në degën e LSDM-së Dijana Saveska, vizituan qendrën spitalore të Kërçovës dhe u shprehën mirënjohje të gjitha grave dhe vajzave  mantelbardha të cilat vazhdimisht i janë ekspozuar rrezikut në përpjekjet për të shpëtuar jetë njerëzish.