IN MEMORIAM, ndërron jetë historiani i njohur, Shukri Rahimi

Prof. dr. Shukri Rahimi lindi në Nasalcë të Bujanocit në vitin 1925. Shkollën fillore e kreu në vendlindje, kurse Normalen në Nish. Më pas përfundoi  Fakultetin Filologjik - Dega e Historisë, në Shkup në vitin  1960. U doktorua në Fakultetin Filologjik të Prishtinës në janar të vitit 1974 me temën: "LUFTA E SHQIPTARËVE PËR AUTONOMI 1898-1912". Prof. dr. Shukri Rahimi fillimisht  punoi si profesor i historisë në Shkollën Normale të Shkupit dhe në SHLP në Shkup. Në vitin 1974 kaloi në Fakultetin Filologjik të Prishtinës si ligjërus i historisë së popujve të Jugosllavisë, ku arriti gradën prof. ordinar i kësaj lënde. 

 

Është i pazëvendësueshëm roli i tij në përgatitjen akademike të disa gjeneratave të historianëve nga të gjitha trevat shqiptare. Ai  ka të botuara dhjetëra punime shkencore, kurse prej veprave më të njohura janë: “Lufta e shqiptarëve për autonomi, 1897-1912”, “Vilajeti i Kosovës më 1878-1912”,  “Gjurmime historike të Rilindjes Kombëtare”. Në vitin 2003 u dekorua me Medaljen e artë të Lidhjes së Prizrenit "Hero i Kosovës"nga Presidenti i Kosovës. Me shuarjen e prof. dr Shukri Rahimit, mbyllet edhe jnë kapitull i rëndësishëm i shkencave tona albanologjike, megjithatë, hapen horizonte të reja që mbi standardet shkencore që ai vendosi, të vazhdojë studimi i periudhave dhe ngjarjeve të njohura nga e kaluara jonë. Varrimi i të ndjerit bëhet sot në varrezat në Butel në Shkup, pas namazit të iqindisë.