Maqedoni

Regjistrimi i popullsisë, ESHS: Gati 50 mijë mërgimtarë janë vetëregjistruar

12.03.2021 10:19

Siç njoftojnë nga Enti Shtetëror për Statistika, deri sot në ora 08:00 janë regjistruar gjithsej 49.837 mërgimtarë....

Siç njoftojnë nga Enti Shtetëror për Statistika, deri sot në ora 08:00 janë regjistruar gjithsej 49.837 mërgimtarë. Shifrat nuk janë të larta marrë parasysh se regjistrimi i mërgatës ka nisur para 13 ditësh, prandaj nevojitet një angazhim më i madh i mërgimtarëve për të mos e lëshuar nga dora mundësinë për t’u regjistruar. Ju përkujtojmë se procedura e regjistrimit online është e thjeshtë. Me vetë kyçjen në sistem dhe dhënien e e-mail adresës suaj, ju merrni në notë me të cilën mund të regjistroni deri në 5 anëtarë. Nëse një familje ka më shumë anëtarë, duhet thjesht me një tjetër adresë elektronike të kërkoni edhe një kod tjetër me të cilin të regjistroni anëtarët e tjerë të familjes suaj. 

Një nga problemet që po haste, është se shumë bashkatdhetarë, në momentin kur përfundojnë regjistrimin e kryefamiljarit dhe shënojnë të dhënat se sa anëtarë ka familja e tyre në mërgim, mendojnë se procedura përfundon me ardhjen e mesazhit : "Regjistrimi u krye me sukses". Mos harroni se në atë moment ju duhet edhe një herë të hapni formularin e regjistrimit dhe të kryeni të njëjtën procedurë edhe për anëtarët e tjerë të familjes tuaj, një e nga një. Vetëm pasi të keni regjistruar çdonjërin prej jush veç e veç, mund të thoni se e keni kryer obligimin ligjor. 
 
Faza e parë e regjistrimit filloi më 1 mars me regjistrimin e mërgatës, regjistrimin e punonjësve në përfaqësitë konsullore diplomatike dhe familjet e tyre, ushtarët që ndodhen jashtë, të burgosurit dhe të pastrehët. Regjistrimi bëhet me numrin amë, e-mail adresë e cila verifikohet dhe me numër telefoni. Regjistrimi i popullsisë rezidente në RMV do të mbahet prej 1 deri më 21 prill, periudhë në të cilën anëtarët e familjeve mund të regjistrojnë edhe mërgimtarët të cilët nuk kanë mundur të regjistrohen online. Gjithsesi edhe regjistrimi online i mërgimtarëve vazhdon deri më 21 prill.