Varheji: RMV të gjejë zgjidhje me Bullgarinë

 

"Republika e Maqedonisë së Veriut ka mbajtur një hap të qëndrueshëm në zbatimin e reformave të BE-së, veçanërisht në drejtim të kushteve themelore. Por, është e rëndësishme që sa më shpejt të gjendet një zgjidhje e pranueshme për çështjet bilaterale midis Maqedonisë së Veriut dhe Bullgarisë.",- deklaroi komisioneri për zgjerim i BE-së, Oliver Varheji.

 

 

Por, kryeministri, Zoran Zaev, i cili mori pjesë në Forum, e ripërsëriti qëndrimin e Qeverisë se Maqedonia asnjëherë dhe me askënd nuk do të negociojë për identitetin dhe gjuhën. 

 

“Që të jem i qartë si kristali dhe të përsëris edhe një herë qëndrimin e Qeverisë. Ne asnjëherë nuk do të lejojmë të bisedojmë për atë që nuk mund të bisedojmë, e ajo është kush jemi, cilët janë atributet tonat të identitetit dhe cila është gjeneza e shtetësisë dhe gjuhës sonë.”,- u shpreh kryeministri, Zoran Zaev. 

 

Sipas komisionerit për Zgjerim, Varheji, suksesi i shteteve gjatë periudhës së ardhshme do të matet edhe përmes një parametri të ri - sa të suksesshëm kanë qenë në sanimin e pasojave nga pandemia me Kovid-19. Ai siguroi se Ballkani Perëndimor është ende prioritet i BE-së dhe se shpreson që bllokada që ndodhi në dhjetor të jetë e përkohshme, jo e përhershme, por që të ndodhë kjo, sipas tij, është i nevojshëm bashkëpunimi i vendeve të Ballkanit Perëndimor. Varheji premtoi lehtësimin e procesit duke e përshkruar veten si një politikan që nuk dëshiron të flasë shumë por të punojë, ndërsa u bëri thirrje vendeve kandidate të premtojnë pak dhe të arrijnë shumë. Ai gjithashtu njoftoi se BE-ja ka në plan të përfshijë vendet e Ballkanit Perëndimor në tregun e përbashkët evropian përpara se të bëhen anëtarë të BE-së.