Maqedoni

Mbi 60 mijë mërgimtarë të regjistruar, Osmani: Presim rritje të numrit ditëve në vijim

15.03.2021 11:00

Mbi 60 mijë mërgimtarë janë regjistruar në 15 ditët e para të procesit të regjistrimit, thotë ministri i jashtëm Bujar Osmani....

Mbi 60 mijë mërgimtarë janë regjistruar në 15 ditët e para të procesit të regjistrimit, thotë ministri i jashtëm Bujar Osmani. Me numër më të madh të të vet-regjistruarve sipas Osmanit prin Zvicra me 16 mijë qytetarë, pasuar nga Gjermania me 10 mijë, Italia me 6 mijë ndërkaq më pak interes ka treguar mërgata në Kanada dhe Australi. Osmani tha se pret gjatë ditëve në vijim të rritet numri i personave të vet-regjistruar sepse siguroi se është përforcuar edhe sistemi që shmang problemet thelbësore me të cilën ballafaqohet diaspora për regjistrim. Potencoi edhe rolin e mediave në inkurajimin dhe motivimin e diasporës për të ndarë pak kohë në këtë proces të rëndësishëm për vendin.

"Jorastësisht për popullatën jo rezidente që jeton jashtë është lënë 51 ditë, jo rastësisht regjistrimi ka filluar një muaj më herët, nga 1 marsi. Është përforcuar në aspekt teknik sistemi. Përfaqësitë diplomatike konsulore po informojnë qytetarët. Regjistrimi është punë e rëndësishme ndërsa pjesëmarrja e diasporës do të thotë mapim i drejtë i shpërndarjes së qytetarëve tanë jasht vendit. Rezultatet i kemi të rëndësishme për të pasur bazë për sjelljen e politikave zhvillimore të bazuara në të dhëna të sakta.", tha ministri i Punëve të Jashtme, Bujar Osmani.
 
Regjistrim i diasporës përmes aplikacionit online mund të bëhet deri me 21 prill ndërsa qytetarët që jetojnë jashtë vendit dhe që nuk kanë mundësi të regjistrohen përmes aplikacionit online, nga 1 prilli do të mund të regjistrohen nga familjarët e tyre  në vend që i dinë të dhënat për personin në fjalë, deklaroi ministri Bujar Osmani.
 
NERMIN MULAKI FEJZULLAHU