Shqipëri, nisi vaksinimi masiv i të moshuarve. Kosovë, sot arrin sasia e parë e vaksinave anti Kovid

Në sheshin Skënderbeu në Tiranë, ka nisur vaksinimi i të moshuarave mbi 70 vjeç. Të vaksinuarit pas vaksinimit thonë se ndjehen mirë. 

 

“Jashtëzakonisht mirë, nuk ndjeva asgjë.”,- tha një qytetar.

 

“Ne jemi pensionistë, unë kam disa probleme shëndetësore, kështu që sado diçka do të mundohemi.”,- theksoi një qytetar.

 

Brenda muajit maj do të kemi gjysmë milioni qytetarë të vaksinuar, deklaroi kryeministri Rama.

 

“Brenda majit do të kemi gjysmë milion shqiptarë të vaksinuar dhe kam bindjen e plotë që do të ecim shumë shpejtë, pasi kemi siguruar sasira të konsiderueshme vazhdojmë punën për të siguruar të gjitha sasitë e nevojshme dhe besoj shumë që ky sezon turistik do të jetë shumë i lehtësuar si rezultat i këtyre goditjeve që i bëhet zinxhirit të infektimeve.”,- u shpreh kryeministri i Shqipërisë, Edi Rama.

 

Me ngritjen e dy çadrave të mëdha për vaksinim synohet që të arrihet objektivi  për vaksinimin e 10 deri në 15 mijë vaksina në ditë. Vaksinimi masiv në Shqipëri ka nisur me 192 mijë dozat e vaksinës kineze Sinovak.

 

Për dallim nga Shqipëria në Kosovë, për here të pare sot pritet të arrijë sasia e pare e vaksinave anti Kovid. Bëhet fjalë për 24 mijë vaksinat të kompanisë AstraZeneca, të cilat në aeroportin “Adem Jashari” pritet të arrijnë rreth orës 20 e 15 minuta.

 

Ky kontingjent është në kuadër të 100.800 dozave të vaksinës së AstraZenecas që Kosova do të marrë falas nga programi Kovaks, i Organizatës Botërore të Shëndetësisë.

 

Kosova është vendi i fundit në rajon që do të nisë fushatën e imunizimit të popullsisë. Në mungesë të vaksinës, Shqipëria deri më tani ka vaksinuar rreth 500 punëtorë shëndetësorë të Kosovës me vaksinën e AstraZenecas.