ISHP “Shtëpia e Shëndetit” - Kumanovë, pajiset me aparaturë për testimin e “D-dimer exclusion ii”

Laboratori në kuadër të Shtëpisë së Shëndetit në Kumanovë me kujdes po përcjell hulumtimet dhe të rejat për ndryshimet tek të infektuarit me Covid-19.

 

Duke e parë mëse të nevojshme, në Laboratorin biokimiko-imunologjik në kuadër të Shtëpisë së Shëndetit në Kumanovë është i instaluar analizator i ri imunologjik VIDAS nga prodhuesi me renome BioMerieux nga Franca.

 

Aparati ka kapacitet prej 80 analizash në orë, me çka shumëfishohet puna, por edhe do të shkurtohet koha e pritjes për marrjen e rezultateve.

 

Në këtë analizator imunologjik bëhen testet D-Dimer Exclusion II, i cili paraqet marker të rëndësishëm klinik për trashjen e gjakut, i cili shkaktohet nga Covid-19 dhe është njëri nga markerët më të rëndësishëm laboratorik për parashikimin e sëmundjes të shkaktuar nga ky virus.

 

“Kërkesat e fundit janë për D-Dimerat për t’i punuar, kjo është risi tek ne se deri tani nuk i kemi punuar, mirëpo me pajisjen me aparaturën e re, kjo përgjegjësi tash bie mbi ne dhe shërbimet mund t’i marrin përmes udhëzimeve nga mjekët amë, mirëpo strikt vlen vetëm për udhëzimet me diagnozën për Covid-19 pacientët.”,- tha drejtori i ISHP “Shtëpia E Shëndetit” – Kumanovë, Faruk Alili.

 

“Ne i përcjellim kërkesat e kolegëve mjekë amë, respektivisht numrin e rritur, andaj kemi shtruar kërkesë për aq sa ka nevojë të rritet numri i testeve  për pacientët, që të mundemi të njëjtit t’i pranojmë përmes fondit.”,- u shpreh specialistja e medicinës biokimike në IShP “Shtëpia e Shëndetit” – Kumanovë, Milena Spasevska Dimovska.

 

“Deri tani kemi punuar me një aparat më të vjetër për realizimin e analizave të D-Dimerave, urgjentisht na e sollën aparatin e ri supermodern, patëm problem deri sa e kompletuam aparaturën, por tani me sukses do të realizojmë punën gjithashtu kemi kërkuar nga fondi dhe që na e kanë pranuar kërkesën për rritjen e numrit të analizave për Covid-19, sidomos për numrin e D-Dimerave.”, - u shpreh laboranti përgjegjës i ISHP “Shtëpia e Shëndetit” – Kumanovë, Xhemaledin Aliti.

 

Vlen të thuhet se në qytetin e Kumanovës ditëve të fundit po shënohet rritje e dukshme e numrit të të prekurve nga Covid-19, ku shifrat kalojnë mbi 80 të infektuar në ditë, si pasojë e rritjes së numrit të mjekët amë kërkuan me urgjencë që numri i testimeve për Covid-19 të rritet me qëllim parandalimin e infeksioneve të reja.

 

Në rajonin e Kumanovës që nga fillimi i pandemisë së Koronavirusit janë regjistruar 6625 të infektuar, aktualisht raste aktive kemi mbi 780, për fat të keq betejën me Covid-19 e kanë humbur 230 pacientë.