I gjithë globi në karatinë për Pashkë, OBSh: 10% e evropianëve kanë marrë një dozë të vaksinës

Miliona vetë në mbarë botën janë nën urdhra të reja për të kufizuar aktivitetet në prag të Pashkëve, si rezultat i shtimit të infeksioneve nga koronavirusi, megjithë vazhdimin e vaksinimeve. Italia vendosi kufizime tri ditëshe duke ndaluar grumbullime të mëdha në Sheshin e Shën Pjetrit për të dytin vit radhazi në kohën e kremtimeve të Pashkës.

 

Në Francë, hyjnë në fuqi masa të reja, pasi në këtë vend po përhapet me shpejtësi një variant i ri më infektues që ka sjellë mbushjen e reparteve të reanimacionit në spitale. Edhe Belgjika dhe vende të tjera evropiane kanë reaguar me masa të ngjashme.

 

Në Gjermani, pandemia ka thelluar mosbesimin ndaj autoriteteve. Presidenti I Gjermanisë u bëri thirrje gjermanëve të bashkohen ndërsa vendi përballet me Pashkët e dyta radhazi të shoqëruara me rritje të infektimeve dhe pakënaqësi lidhur me masat qeveritare. Nga OBSH thonë se në Evropë, ritmet e vaksinimit kanë qenë zhgënjyese. 

 

"Vetëm 10% e evropianëve kanë bërë një dozë vaksine dhe pak më shumë se 4% janë të imunizuar plotësisht kundër COVID-19 kjo është shqetësuese. Javën e kaluar u bëra një kërkesë urgjente vendeve me doza të vaksinave kundër covid-19 që janë autorizuar për përdorim emergjent nga OBSH, të japin menjëherë 10 milionë doza për programin Covax. Sfida është e madhe, por ne ende nuk po shohim angazhim për sigurimin e dozave të nevojshme”, u shpreh drejtori i OBSh-së, Tedros Adhanom Gebreyesus.

 

Në anën tjetër të Atlantikut, provinca kanadeze e Ontarios është nën raundin e tretë të masave kufizuese që duke filluar nga e shtuna do të reduktojnë aktivitetin për 28 ditë.

 

Edhe në Kanada ka pasur përhapje të varianteve të reja më ngjitëse të koronavirusit. Përveç Ontarios, edhe provincat e Kebekut dhe “British Kolumbias” kanë vënë kufizime.Brazili po përjeton një nga goditjet më të rënda të kësaj pandemie pasi varianti i ri i zbuluar për herë të parë në këtë vend vazhdon të përhapet duke alarmuar mbarë Amerikën Latine.

 

Bolivia ka mbyllur kufirin me Brazilin; Kili ka mbyllur plotësisht kufijtë dhe Ekuadori e Peruja kanë vënë në zbatim masa kufizuese.