Kovid-19, 1740 pacientë në trajtim spitalor

 

 

Vaksinimi është mënyra e vetme për ta mposhtur virusin, thotë ministri i shëndetësisë, Venko Filipçe, në Ditën Botërore të Shëndetësisë. Gjatë vizitës në Entin Geriatrik për të parë nga afër se si po zhvillohet procesi i vaksinimit të personave të moshuar, Filipçe informoi se deri më tani në të gjitha punktet në vend sistemi i vaksinimit është duke funksionuar siç duhet, ndërsa paralajmëroi se deri në fund të muajit vendi do të pranojë edhe vaksina shtesë. 

 

“Vaksinat “Fajzer” i presim këtë muaj gjithashtu edhe ato kineze në fund të muajit. Të gjitha sistemet që funksionojnë për t’u vaksinuar si tek të vjetrit edhe tek infrastruktura kritike do të kenë vaksina shtesë. Në ndërkohë, sistemi i vaksinimit po funksionon mirë, po vazhdon vaksinimi nëpër të gjitha punktet në shtet. Në Arenën Sportive “Boris Trajkovski” po vaksinohen përfaqësuesit e Armatës dhe një pjesë e mësimdhënësve, ata të klasës së parë deri në të tretën.”,- tha Filipçe. 

 

I pyetur lidhur me rritjen e çmimeve të ilaçeve për trajtim të Covid-19, ministri i shëndetësisë tha se mund të intervenohet vetëm tek ilaçet që janë në listën pozitive të Agjencisë për Ilaçe.                                                      

“Ato ilaçe që blihen në mënyrë private, me të vërtetë nuk kemi mekanizëm si t’i kontrollojmë, në këtë aspekt tashmë është hapur çështja për zëvendësimin e Heparinit dhe besoj që këtu do të gjejmë zgjidhje me Fondin.”,- theksoi Filipçe.

 

Filipçe po ashtu tha se shteti nuk ka një mekanizëm zyrtar për të urdhëruar spitalet private për të ulur çmimet.