Vendet në tranzicion, Freedom House: RMV, me përparimin e dytë më të madh demokratik

 

“Qeveria e majtë e Kryeministrit Zoran Zaev ka riparuar disa nga dëmet institucionale të shkaktuara nga paraardhësi i tij i djathtë populist dhe ka ende një shans për të vënë në jetë aspektet pozitive të demokracisë”, thuhet në raport. 

    

 

Në Ballkan, ku përparimet demokratike janë zmbrapsur në shumicën e vendeve, është veçanërisht e nevojshme një histori suksesi, thuhet në raport. Shqipëria, që edhe këtë vit është në kategorinë e regjimeve hibride, shënoi rënie në shoqërinë civile dhe median e pavarur. Dy treguesit me vlerësimin më të ulët janë edhe korrupsioni dhe pavarësia e gjyqësorit. Publikimi i raportit të këtij viti përkon me një kohë kur është bërë e qartë që Partia Socialiste në Shqipëri do të qeverisë edhe për një mandat tjetër. Vlerësimi për ecurinë e zgjehdjeve,  do të analizohet në raportet e ardhshme të Freedom House.

      

Edhe Kosova është po ashtu në grupin e regjimeve hibride. Këtë vit ajo shënoi rënie në kategorinë e qeverisjes demokratike. Vlerësimet për pavarësinë e gjyqësorit dhe korrupsionin vazhdojnë të jenë të ulëta, njësoj si një vit më herët. Ngjashëm edhe në Mal të Zi. 

 

 

Në zonën me 29 vende të Euroazisë dhe të Evropës Qendrore dhe Lindore që mbulon raporti, numri i demokracive është më i ulëti që nga  viti 1995. Janë shënuar shenja të  thellimit të autokratizimit në vende si Hungaria dhe Polonia, të cilat ndihmuan në udhëheqjen e tranzicionit më të gjerë drejt demokracisë në vitet 1990. Forca e përgjithshme e demokracisë në rajon ka rënë për 17 vjet rresht. Rusia dhe Bjellorusi, kategorizohen si regjime të konsoliduara autoritare. Shfaqja e fundit e forcës ushtarake ruse përgjatë kufijve të Ukrainës tregojnë se deri ku janë të gatshme të shkojnë këto regjime, për të qëndruar në pushtet, thuhet në raport.