Crvenkovska në krye të KGJ-RMV: Do të kthejmë dinjitetin dhe besimin në Гjyqësor

 

"Qytetarëve të RMV-së ju premtoj se përbërja e këtij Këshilli Gjyqësor, me mua si kryesuese, do të bëjë gjithçka, do të bëjë përpjekjet maksimale për të ngritur dinjitetin e sistemit gjyqësor dhe të paktën në një shkallë për të rritur besimin e qytetarëve në gjyqësor. Është koha të tregojmë se ky sistem gjyqësor dhe ky Këshill Gjyqësor mund të bëjnë shumë, se ka njohuri dhe se ka kapacitet e nevojshme.", tha Pavlina Crvenkovska, kryetare e Këshillit Gjyqësor

 

 

Crvenkovska ishte  e prerë se në këtë post nuk u zgjodh politikisht, por për shkak të profesionalizmit dhe integritetit personal, si dhe me 25 vite përvojë pune. Porositi të gjithë gjykatësit të mos bien pre e ndikimeve nga politika apo biznesi por të punojnë në përputhje me ligjet. Premtoi shpërblime për gjykatësit profesionistë por edhe shkarkime për joprofesionistët.  

 

"I porosis gjykatësit që e kanë bërë punën e tyre me ndërgjegje dhe sinqeritet deri më tani, të vazhdojnë ta bëjnë dhe te unë do të kenë  gjithmonë një aleat në mbrojtje të integritetit të tyre profesional këshilli gjyqësor është këtu që të  avancojë, shpërblejë dhe mbrojë gjykatësit profesionistë dhe të përgjegjshëm. Gjithashtu, Këshilli Gjyqësor është këtu për të shkarkuar të gjithë gjykatësit të cilët do të tregojnë se e kanë kryer punën e tyre në mënyrë joprofesionale.", tha Crvenkovska.

 

Crvenkovska është kryetarja e parë e Këshillit Gjyqësor,  që zgjidhet sipas Ligjit të ri që hyri në fuqi vitin e kaluar, sipas të cilit zgjedhja e kryetarit  bëhet nga anëtarët e këshillit me të drejtë vote,   që zgjidhen nga Kuvendi. Megjithëse kjo dispozitë e Ligjit është kundërshtuar para Gjykatës Kushtetuese, Crvenkovska thotë se seanca duhej mbajtur pasi skadoi mandati dy-vjeçar i kryetarit  aktual Kiro Zdravev, i cili nuk mori pjesë në seancë pasi është në izolim.