Zaev: Kemi siguruar ruajtje të mijëra vendeve të punës

Në ditën ndërkombëtare të punëtoreve  kryeministri, Zoran Zaev, ka deklaruar se në kushte pandemie prioritet për qeverinë që drejton ai i ka qenë ruajtja e vendeve të punës.  Kemi ofruar mbështetje për të shpëtuar mijëra vende pune, që mijëra punëtorë të marrin paga të rregullta dhe të sjellin të ardhura për familjet e tyre, ka theksuar Zaev.

“Vendet e punës në radhë të parë! Ky ishte qëllimi kryesor i takimeve të para me ekipet ekonomike kur filloi pandemia. Dhe unë jam i kënaqur që qëllimi ynë nuk kishte shumë kundërshtarë- përkundrazi, përmes konsultave të përbashkëta me kompani dhe sindikata, ne arritëm t’i mbajmë angazhimet e punës së shumë prej qytetarëve tanë dhe kështu ta mbajmë ekonominë gjallë dhe dinamike.”,- deklaroi kryeministri i RMV-së, Zoran Zaev.

Xhaferi: Detyrë e politikanëve të sigurojnë pagë dinjitoze

Kryeparlamentari Talat Xhaferi, ka kujtuar, se është detyrë e politikanëve të sigurojnë pagë dinjitoze për punëtorët. 

“Në Ditën ndërkombëtare të punës, të rikujtojmë edhe njëherë se është detyrë e politikanëve të sigurojnë respektim të mundit njerëzor, pagë dinjitoze dhe vlerësim të punëtorit, por edhe të parandalojmë eksploatimin, mobingun, pabarazinë në pagat ndërmjet burrave dhe grave.”,- ka shkruar Xhaferi.

Pendarovski: Paga dinjitoze për punëtorët, është detyrimi ynë

E presidenti, Stevo Pendarovski  ka vlerësuar, se sigurimi i pagës dhe punës së denjë për punëtorët, është detyrim i funksionarëve të shtetit.

“Urime 1 Majin, Ditën e punës! Puna e paga dinjitoze dhe respektimi i të drejtave të punëtorëve janë detyrimi dhe përgjegjësia jonë”, ka shkruar Pendarovski.

Mickovski: Punëtori dhe puna e tij janë zhvlerësuar

Ndërkohë, për liderin e opozitës, Hristijan Mickovski, këtë vit punëtori dhe puna e tij janë zhvlerësuar dhe nënvlerësuar si kurrë më parë.

“Ky vit është viti më i zi ekonomik për Maqedoninë. Për një vit në Maqedoni ka mbi 60 mijë të papunë të rinj, mbi 6000 kompani që kanë vënë çelësin në dyert e tyre dhe pothuajse 600 mijë njerëz jetojnë në varfëri. Për më tepër, jeta po shtrenjtohet, çmimet e artikujve ushqimorë themelorë po rriten, karburantet dhe energjia elektrike po shtrenjtohen, dhe bashkë me to edhe kostot e secilës familje. Pashpresa dhe ndjenja se ata janë lënë vetëm në baltë shënojnë këtë 1 maj.”,- ka shkruar Mickovski. (Naim Ramadani, TVM2)