Ferronikeli mposht Shkëndijën dhe fiton Kupën "Pavarësia"

Skuadra në fjalë ka triumfuar ndaj Llamkos Kosova, falë penalltive, dhe në finale ndaj Shkëndijës së Tetovës, falë një goli të Përparim Livorekas.

Shorti i përplasjeve ishte hedhur të enjten në mbrëmje, gjatë ceremonisë së organizuar nga FSHF-ja me përfaqësuesit e të katër skuadrave. Ndeshja e parë u luajt mes Flamurtarit dhe Shkëndijës së Tetovës. Fitoi 1-0 kjo e fundit, sepse trajneri Ernesto Ramela preferoi të aktivizonte mjaft të rinjtë, duke e ruajtur grupin për ndeshjen e fundjavës në kampionat, me Elbasanin.

Duhet nënvizuar fakti se për shkak të angazhimeve në kampionat, edhe kuqezinjtë e Tetovës përfaqësoheshin me ekipin e dytë, të përforcuar me Armend Alimin, që s’ka të drejtë loje në kampionat, pas 5 kartonëve të verdhë.

Ballafaqimi i dytë u luajt mes Llamkos Kosova dhe Ferronikelit. Dy skuadrakosovare këto, që kryesojnë në kampionatin përkatës. Loja ka qenë e ekuilibruar dhe goli ka munguar në 45 minutat e luajtura (aq ka qenë kohëzgjatja e një ndeshjeje të këtij turneu). Kështu, për të përcaktuar fituesin është dashur gjuajtja e penalltive. Ferronikeli ka triumfuar me rezultatin 3-1 nga pika e bardhë. Spikati me pritjen e tri penalltive portieri Granit Kolshi.

Skuadra, kryesisht falë tij, mbërriti në finalen e turneut, Shkëndija e Tetovës-Ferronikeli.

Në këtë finale vendosi goli i Përparim Livorekas, që shënoi në minutën e 6-të dhe i dha Ferronikelit "Kupën Pavarësia".

Skuadra “fair-play” e turneut u shpall Flamurtari i Vlorës, skuadra mikpritëse, ndërsa lojtari më i mirë i u shpall portieri Granit Kolshi.