Takimet e fundit të grupeve PDK-LDK

Grupet Punuese të Partisë Demokratike të Kosovës dhe Lidhjes Demokratike të Kosovës, do të takohen gjatë dy ditëve të vikendit për harmonizimin e programit qeveritar dhe për ndarjen e përgjegjësive. 

 

Këto do të jenë takimet e fundit të këtyre grupeve, pasi që liderët e koalicionit kanë paralajmëruar se në fillim të javës që vjen do të nënshkruhet marrëveshja me të cilën do të bëhet ndarja e përgjegjësive, përfshirë edhe fushat e caktuara të qeverisjes.

 

Kurse, pas kësaj do të pasojnë konsultimet e brendshme për caktimin e kabinetit qeveritar.

 

Ndërkohë, vonesën e krijimit të institucioneve pas arritjes së marrëveshjes ndërmjet PDK-së dhe LDK-së analistët politikë e shohin si tërësisht të paarsyeshme dhe si një mungesë respekti ndaj qytetarëve.

 

Sipas tyre, PDK e LDK deri më tani do duhej ta kishin qartësuar ndarjen e posteve ministrore, sikurse edhe prioritetet tjera që kanë të bëjnë me krijimin e institucioneve.

 

Edhe më e paarsyeshme kjo vonesë bëhet kur kihet parasysh fakti që janë bërë më shumë se gjashtë muaj nga zgjedhjet nacionale dhe ende nuk janë formuar institucionet e reja të dala nga këto zgjedhje vlerësojnë analistët Artan Muhaxhiri dhe Riza Smaka.