Protokollet e reja për dasmat: Matje temperature, ndalim përqafimi e kërcimi

 

“Në hyrje të vendoset dezinfektues dhe të matet temperatura. Hapësirat në tarracat verore duhet të jenë të hapura në tre anët. Ndalohet përshëndetja me dhënien e dorës, përqafim ose kontakt tjetër fizik me mysafirët. Muzika, gjegjësisht angazhimi i artistëve të estradës është i lejuar vetëm gjatë organizimit të dasmave, të cilët duhet të jenë në largësi prej së paku 5 metrave nga tavolina më e afërt dhe nuk guxojnë të lëvizin dhe këndojnë në mesin e mysafirëve. Lejohet kërcimi në hapësirë të siguruar prej 4 metra katror për person, duke respektuar distancën e rekomanduar.”,- tha zëdhënësi i Qeverisë, Muhamet Hoxha.

 

Sipas rekomandimeve të reja, vallëzimi do të lejohet vetëm për çiftin e ri, të tjerët në këtë periudhë le t’i harrojnë vallëzimet romantike me partnerët apo kapjen përdore në valle.

 

 

Por sa janë të kënaqur pronarët e salloneve të dasmave dhe a kanë llogari për të punuar në këtë ritëm. Nga ky sektor nuk shprehen aspak të kënaqur me masat e reja. Ekrem Memishi, pronar i një salloni dasmash në Shkup për TVM2 thotë se është e pakuptimtë që me një anë lejohet që restorantet të punojnë me 50% kapacitet, e në anën tjetër kufizojnë numrin deri më 100 persona. Sipas tij me protokollet e shumta, shpenzimet janë të papërballueshme për sektorin e gastronomisë.

 

“Kjo sallë është 100 metër katror, ka kapacitet për gati deri më 500 persona, pot ë ishte 50% do të ishte 250 persona. Me 100 persona, unë nuk kam llogari t’i lëshoj klimat dhe dritat, nuk kam llogari të punoj. Ky objekt është i madh, harxhimi është i njëjtë si për 100 si për 300. Mund të them se është mirë që të mos punonim fare, se kështu.”,- tha pronari i sallonit të dasmave, Ekrem Memishi.

 

Sipas protokollit, në dasmë mund të këndojnë vetëm artistë të estradës që janë të licencuar. Pas përfundimit të dasmës, e detyrueshme është të bëhet pastrim mekanik dhe dezinfektim i objektit.