Po vjen i nxehti “Afrikan”, temperatura të enjten e të premten, 40 gradë

 

I nxehti vjen edhe me dukuri të paqëndrueshmërisë lokale  të motit, që për shkak të energjisë së lartë të krijuar në atmosferë,  po manifestohen në  formën e stuhive me shi të rrëmbyeshëm intensiv, shkarkime të forta elektrike, erëra të forta dhe breshër të izoluar. Prandaj qytetarëve u apelohet të bëjnë kujdes dhe  të mos qëndrojnë jashtë gjatë periudhave me shi e vetëtima, sidomos jo nën pemë.

 

Nga nesër dhe në ditët në vijim, nën ndikimin e masës së ngrohtë të ajrit nga jugu, moti do të jetë shumë i nxehtë me temperatura mbi mesataren e sezonit. Të martën temperaturat do të ngrihen mbi 30 gradë, në ditët në vijim edhe mbi 35 gradë. Ditët më të nxehta të këtij qershori pritet të jenë e enjtja dhe epremtja, kur temperatura në disa qytete do të kalojë 40 gradë. Vazhdojnë të vlejnë këshillat e zakonshme për ditët e nxehta, mos dilni pa nevojë, pini sa më shumë ujë dhe patjetër për të sëmurët kronikë, merrni në kohë terapinë mjekësore.