Aeroplanë iranianë kanë kryer sulme ndaj SHI-së në Irak

Aeroplanë ushtarak iranianë gjatë dy ditëve të fundit kanë kryer një sërë sulmesh ndaj pozicioneve të grupit Shteti Islamik (SHI), njoftoi mbrëmë zëdhënësi i Pentagonit, Xhon Kirbi.

 

"Kemi dëshmi se iranianët kanë kryer sulme me aeroplanë F-4 Fantom", theksoi Kirbi.

 

Deklarata e Kirbit pasoi pasi televizioni AL Arabia emetoi video incizim në të cilat është shfaqur se si aeroplanë të tipit F-4 kryejnë sulme ndaj caqeve në provincën irakiane Diala në afërsi të kufirit me Iranin.

 

Aeroplanët e prodhimit amerikan F-4 Fantom ende janë pjesë e Aviacionit ushtarak iranian.

 

Kirbi theksoi se Qeveria irakiane është e obliguar t'i koordinojë sulmet ajrore ndaj xhihadistëve, që i kryejnë forcat e armatosura të vendeve të përfshira në koalicionin ndërkombëtar për luftë kundër SHI-së.

 

Zëdhënësi i Pentagonit shtoi edhe se nuk ka ndryshim në politikën e SHBA-së lidhur me refuzimin që të bashkëpunohet me Iranin.

 

Armata iraniane është aktive në rajonet kufitare midis Iranit dhe Irakut dhe u ndihmon grupeve militante shiite dhe forcave irakiane në luftën kundër kryengritësve sunitë, por kjo është hera e parë që Uashingtoni të konfirmojë se aeroplanë iranianë kryejnë sulme ajrore ndaj SHI-së.

 

Sipas burimeve diplomatike, ekzistojnë informata edhe se Irani i ka lënë në dispozicion Irakut aeroplanë të tipit Su-25, të cilët i drejtojnë pilotë iranianë./MIA