Invalidët i njohin shumë pak të drejtat që ua garanton ligji
Në “Ditën ndërkombëtare të personave me invaliditet” edhe autoritetet premtuan se do të bëjnë gjithçka që kanë në dorë për të integruar në shoqëri, por edhe në tregun e punës këtë kategori qytetarësh....
Një numri të madh të këtyre njerëzve, shëndeti dhe shkalla e invaliditetit ua lejojnë të punojnë, por ata shumë rëndë mund ta realizojnë këtë të drejtë.
Ministri i Punës dhe Politikës Sociale, Dime Spasov, thotë se janë realizuar shumë projekte për përkrahjen e tyre, por edhe më tej do të punohet për të drejta më të avancuara.
“Parashihet që në korrik të vitit 2015 të zbatohet një shtesë e veçantë për fëmijët me sindromin “Down”, si dhe rritja e asistencës sociale që u jepet prindërve që kujdesen për këtë kategori të fëmijëve për 25 %, po ashtu edhe refundim të mjeteve për 80 %, në dogana për personat me invaliditet trupor dhe të verbërve për sigurim të veturave speciale. Për momentin punojnë në ndryshimin e ligjit dhe presim të fillojë realizimi i këtyre projekte”- deklaroi ministri i Punës dhe Politikës Sociale, Dime Spasov.
Por, qytetarët pak i njohin ndryshimet ligjore, e kur bëhet fjalë për qytetarët shqiptarë të kësaj kategorie, ata shumë pak janë të informuar për beneficionet që u takojnë.
“Fatkeqësisht edhe më tutje këta persona me invaliditet pak i njohin ligjet, po flas sidomos për pjesën shqiptare, shumë pak, duke mos i shfrytëzuar të drejtat e tyre pikërisht për shkak të mosinformimit të këtyre personave dhe familjeve”- tha defektologu, Benjamin Istrefi.
Organizatat e invalidëve kërkojnë që të respektohet Ligji i Marrëdhënieve të Punës, ku firmat të cilat kanë mbi 35 të punësuar, të punësojnë edhe persona me nevoja të veçanta, por me këtë rast të përfshihen të gjitha kategoritë e këtyre personave, pa marrë parasysh shkallën e invaliditetit.
“Nene të caktuara në kuadër të këtij ligji duhet të përmirësohen, të theksohet se punësimi duhet t’i përfshijë të gjitha kategoritë e personave me invaliditet dhe që nënkupton personat që kanë lëndime trupore, verbëri, shurdhmemecë, por edhe pengesa në zhvillimin intelektual”- u shpreh kryetari i Këshillit Nacional të Invalidëve, Branimir Jovanovski.
Në Maqedoni, 10 % e popullatës janë persona me invaliditet. Edhe pse atyre u takojnë të gjitha të drejtat e garantuara me dokumentet universale të KB-ve, ata edhe më tej hasin në paragjykime, diskriminim dhe margjinalizim në shoqërinë tonë. (Flutura Latifi, TVM2)